Roldan: Lahi nga klase sa Aids | SunStar

Roldan: Lahi nga klase sa Aids

Time to read
1 minute
Read so far

Roldan: Lahi nga klase sa Aids

Tuesday, May 23, 2017

NAGLIPANG karon ang balita kabahin sa duha ka Aids. Ang usa mao ang pagdaghan sa gitakbuyan sa sakit nga "Acute Immune Deficiency Syndrome" nga hangtud karon nagkagidlay pa ang mga eksperto sa pagpangita ug tukmang tambal.

Ang ika-duha mao ang Aids nga "Ayudang Internasyonal Dili Swak" ni Duterte. Tabang kini nga pinansyal, materyal, teknolohiya o mga eksperto nga gihatag sa European Union (EU) dinhi sa Pilipinas nga dili kuno dawaton ni Presidente Rody.

Apan may laing pa nga Aids o ang gitawag nga "Another Income Deposited Somewhere." Medyo talinghaga kining ikatulo nga klase.

Ang unang Aids kay dako kaayong hadla sa kahimsog sa katawhan sa kalibutan. Kung di ko masayop, walay nasud nga wa nakalikay niini samtang uso pa ang paghilawas sa tawo, pagpatusok ug dagom, pagdugang ug dugo ngadto sa laing tawo ug ang pagpanganak ug pagpatutoy sa bata sa inahan nga positibo sa HIV nga maoy hinungdan sa balatian.

Subay sa pagtuon, mas daghan ang natakbuyan niini nga mga "Men Having Sex with Men" (MSM) kaysa mga babaye. Mas makatakod ang mga babaye nga way matris ug naay bigote kaysa tinuod nga babaye bisan kadtong mga "prostituted women".

Delikado sab ang ikaduhang AIDS tungod kay minilyon nga pundong tabang gikan sa EU alang sa katawhang kabus ang dili nila madawat sama sa mga programa sa serbisyo sosyal, patubig, agrikultura, edukasyon, panglawas, teknolohiya, pangihabuhian, tawhanong katungod, ug uban pa.

Dako baya kaayo ang tabang sa EU sa mga programa sa gobyerno ug pribadong sektor matag tuig aron makab-ot nato ang Millennium Development Goals (MDGs) kaniadto ug karon ang Sustainable Development Goals (SDGs) sa sunod 15 ka tuig.

Nibahad man god si PRody nga putlon na niya ang pagdawat sa ayuda sa EU subay sa iyang "Independent foreign policy" ug ang medyo pagkiling niya sa China ug Russia inay nga magpabiling tuta sa United States of America hangtud sa kahangturan.

Grabe ang reaksiyon niini sa mga nasud nga miyembro sa EU ug mga grupo nga nakapahimulos sa pundo. Unsaon na daw kung may kalamidad nga mokusokuso sa nasud sama sa bagyong Pablo ug Yolanda?

Sayon daw istoryahon apan lisud kung tinud-on kini sa kasamtangang administrasyon. Hinuon gibakwi kini ni PRody ug matud pa niya nga sugyot kini sa iyang mga tighunghong sa pinansya nga sila si Finance Secretary Sonny Dominguez.

Di pod ko motuo nga putlon ang tabang sa EU sa Pilipinas kay puwede man nilang iagi ang ilang pundo sa mga lehitimo ug rehistradong non-government organizations (NGOs) ug civil society organizations kung di dawaton sa gobyerno.

Sa laing bahin, ang ikatulong AIDS delikado sab kay mao kini ang gigamit nga paagi sa mga kurap sa pagtago sa ilang bahandi.

Kinitaan kini gikan sa mga "junket, racket, kickback, moonlighting" sa mga anaa sa gahum apan dili moguwa sa ilang Statement of Assets, Liabilities and Net Worth (SALN).

Puwede sab ni ang gigamit sa mga bana nga may sekreto nga dili nila gustong mahibal-an sa ilang asawa aron ingnon nga limpyo. O, naa moy laing klase sa Aids diha?

Gipatik sa mantalaang Superbalita Davao Mayo 24, 2017.

View Comments