Dura: Palagputon si Aguirre! | SunStar

Dura: Palagputon si Aguirre!

Time to read
1 minute
Read so far

Dura: Palagputon si Aguirre!

Tuesday, May 23, 2017

NING adlawa, atong hatagan og pagtagad ang suwat pamahayag sa Save Sulu Movement nga gipadangat kanako sa ilang spokesperson, Prof. Octavio Dinampo, pinaagi sa e-mail. Alang sa inyong kasayuran, mao kini ang unod sa ilang pahayag nga atong gihubad sa Cebuano:

"Ang Save Sulu Movement mihangop sa Resolution nga giduso ni Congressman Munir Arbison nga nanawagan sa usa ka congressional investigation sa giingon nga multi-million bribery nga nagpakita sa direkta nga pagpanghilabot ni Justice Secretary Vitaliano Aguirre sa pagpaningkamot nga maimpluwensiyahan ang iyang mga ginsakpan ug ang malisyuso nga pagsuway sa pagpugos sa iyang Assistant State Prosecutor nga mopasaka sa way piyansa ug way basehan nga kasong kriminal batok Congressman Arbison aron lipayon iyang kliyente, Abdusakur Tan.

"Sa usa ka audio record nga gipaskin sa social media, si Aguirre madungog nga iyang gipugos ang ubos nga sakop (subordinate) nga mopasaka og kaso bisan way igong hinungdan.

"Unsa may tinguha sa Kalihim sa pagpangabogar sa iyang kauglingong kliyente sa DOJ? Ang Aguirre and Aguirre Law Firm nag-opisina sa Padre Faura? Ang gihimo ni Secretary Aguirre sa Tan vs Arbison nga kaso klaro nga alang sa iyang private law practice nga di sayon nga buhian tungod kay maginansiyahon kini. Kini naglangkob sa graft ug corruption ug kalapasan sa rule of conduct sa mga abogado.

"Apan isip alter-ego sa Presidente, si Aguirre di makasilbi sa Presidente ug Sakur Tan sa managsama nga higayon.

"Kami nanawagan, poreso, ngadto sa Presidente nga hinanaling paglaputon si Aguirre.

"Segurado, ang gihimo ni Aguirre labaw pa sa aso, mas kusog pa sa hunghong sa kurapsyon. Siya di angayan nga anaa sa halangdon nga pamilya sa Pangulo.

"Kami nanawagan usab sa Ombudsman ug Integrated Bar of the Philippines nga gilayong mag-imbestiga sa maong butang."

+++

Ang atong gipatik sa unahan mao ang pahayag sa Save Sulu Movement nga nakasaway sa kalihim tungod kay ilang katungod ang pagpadayag sa ilang mulo batok sa opisyal sa gobyerno.

Ang maong pahayag gibase sab nila sa 43-minutos nga recording
sa pagsultihanay sa giingon nila nga si Sec. Aguirre ug usa ka Assistant Stater Prosecutor.

Sa akong panglantaw, di sayop ang panawagan sa Movement tungod kay ilang nakita nga di maayo ang gihimo sa kalihim. Apan sa laing bahin, wa sab kita masayud kung unsa ang tumong sa kalihim labot sa maong isyu.

Gani, daghan ang nakadayeg sa kalihim tungod kay iyang gihimo ang trabaho nga gisangon kaniya, usa na dinhi ang pagsapaka og kaso batok ni Senator Liela De Lima.

Ug subay sa akong kasinatian ug namatikdan, di basta-basta nga mopalagpot si Pangulong Rodrigo Duterte sa iyang mga sinaligan hangtud nga magpabilin pa ang iyang pagsalig.

Gipatik sa mantalaang Superbalita Davao Mayo 24, 2017.

View Comments