Editoryal: Naglantaw sa kaluwasan sa mga bata | SunStar

Editoryal: Naglantaw sa kaluwasan sa mga bata

Time to read
1 minute
Read so far

Editoryal: Naglantaw sa kaluwasan sa mga bata

Monday, May 22, 2017

KON duna may mga motorista nga mialma karon sa gipatuman nga Republic Act 10913 kun Anti-destructed Driving Act, duna say daghan ang mipadayag sa ilang pag-uyon.

Sabagay kon hingpit na gyud nga mapatuman kini sa Davao Region, seguradong magpuasa na gayud ang mga motorista nga di mogamit og mga gadgets samtang naa sa biyahe.

Hinuon, sa karon duna pay himuong information drive ang Land Transportation Office aron nga mas pasabton pa og maayo ang mga motorista bahin sa maong balaod una hingpit nga ipatuman aron nga di malibog, sama sa nahitabo sa kaulohan.

Sa pikas bahin, naapil karon og patuman ang Republic Act 10666 kun Childrens' Safety Motorcycle Act of 2015 kon diin gidili ang pagpasakay og mga bata sa motorsiklo.

Dinhi sa dakbayan sa Davao, daghan nang mga single motorcycle nga gigamit nga pampasahero isip mga habal-habal. Ug kasagaran sa mga drayber niini, way gipiling pasahero, hamtong man o bata, ilabi na gyud sa hilit nga dapit.

Kini nga kahimtang atong makita panahon sa ting-eskuwela. Kon diin daghang mga gagmay'ng kabataan i-angkas sa motor aron nga ihatud ngadto sa ilang mga tunghaan.

Nakasabot kita nga sa kabukiran motor lang ang pamaagi sa transportasyon. Busa di malikayan nga bisan gagmay nga bata makaangkas sa motorsiklo.

Hinuon, duna kini exemption kay kadtong mga bata nga makatungtong na sa tumbanan sa motor ug makagakos sa drayber maoy tugotan nga makaangkas niini, basta magsul-ob lang gihapon og helmet.

Gawas niini, gitugtan sab sa balaod nga makasakay ang mga gagmay'ng bata panahon sa mga emerhensiya.

Kini nga balaod tataw nga naglantaw sa kaluwasan sa mga angkas sa motorsiklo, ilabi na gyud sa mga kabataan kinsa maoy labing maalaut panahon sa mga disgrasya.

Gipatik sa mantalaang Superbalita Davao Mayo 23, 2017.

View Comments