Meditalk: Nangutana kon duna bay tambal nga makapugong sa pagkatiguwang (2) | SunStar

Meditalk: Nangutana kon duna bay tambal nga makapugong sa pagkatiguwang (2)

Time to read
1 minute
Read so far

Meditalk: Nangutana kon duna bay tambal nga makapugong sa pagkatiguwang (2)

Tuesday, May 23, 2017

(Pasiuna: Kini ang atong apas-sumpay sa suliran nga gipadangat kanato ni Salome K. mahitungod sa iyang pagpangita sa tambal nga makapugong sa pagkatiguwang.)

DEAR Salome K.,

Ug karon, magpadayon na kita sa pag-atubang sa imong sitwasiyon sa imong gipangita nga tambal sa pagpugong sa pagkatiguwang.

Kinsa man bitaw ang gusto matigulang? Dili lamang nga magsugod na kita sa mga gipangbati sa lawas, anaa pa gayud unya ang mga kunot sa nawong nga dili gyud nindot tan-awon. Sakit usab, di ba Salome K. kung tawagon ka og Manang o di ba kaha, Nanay? Ang problema kay ang uban nga motawag og Manang ug Nanay nimo mas tigulang pa tan-awon...hehe.

Ang imo bitaw nga pangutana daw kataw-anan, pero, angay gayud nga hinuktukan. Gani, ang numero uno nga hinungdan sa tanang mga dagko kaayo nga mga sakit susama sa kanser, sakit sa kasing-kasing ug Alzheimer's mao kining pag-edad.

Apan, inay sa pagtambal sa maong mga sakit, posible ba kaha nga tambalan na lamang og diretso ang proseso sa pag-edad?

Kini karon ang ginatrabaho nga ideya sa dapit sa pagtuon nga ginatagaan og grabe nga suporta gikan man sa gobyerno ug sa mga pribado nga sektor.

Ang mga donasyon, nilakip sa mga milyones gikan sa mga ehekutibo gikan sa Silicon Valley, susama sa uban nga nitukod sa Microsoft nga si Paul Allen. Samtang ang mga pederal nga ahensiya sa siyensa didto sa Estados Unidos naglisud ug pagpangita og pundo sa niaging mga dekada, ang pagpundo alang sa National Institute on Aging niusbaw og sobra sa singkuwenta porsiyento gikan pa niadtong 2007.

Ang mga nagtuon nagapangita og tambal aron matukod ang mga pinakaseryuso nga mga hingdangatan unya sa pag-edad ug mapabilin ang mga tawo nga maayo og lawas, aktibo ug mas alerto sa pipila ka katuigan nga mas dugay.

Pero, lisud sad kung mapareha na unya kita ni Drakula nga pipila na ka gatusan ang pangedaron..hehe.. ug mahitabo man kana, naaaaa, mas dako na ang mga problema nga ato unya nga atubangon.

Apan kung mapakubos nato ang kadaghanon sa mga pasyente nga adunay Alzheimer's ug Parkinson's disease, kana ang atong ginahanduraw.

Apan tungod kay taas-taas pa man gihapon ang atong pagahisgutan mahitungod niining imong sitwasiyon, tugoti ako nga ato na usab kini nga padayunon og pagtuki sa sunod nga edisyon niining atong patik. Hangtud na usab sa sunod!

Dr. Fritz

(Si Dr. Fritz Legarde Espedilla usa ka aesthetic dermatologist/surgeon ug clinical sexologist. Aduna usab siyay kahibalo ug training sa hypnotherapy ug sa Medical Acupuncture. Usa usab siya ka personalidad sa radyo nga sobra na sa dekada nga nagadagan sa kahanginan ug autor sa iyang libro nga “Healthy is Sexy Secrets ni Dr. Fritz.” Nagatudlo usab siya sa usa ka kolehiyo sa Pharmacy. Alang sa inyong mga sulat-suliran, mamahimo kini ninyong ipadala sa Dear Dr. Fritz, c/o SunStar-Davao Publishing Inc., Ebro-Pelayo Building, Jacinto St., Davao City, (former Department of Foreign Affairs office), across Ateneo de Davao University and beside Holy Child School of Davao, o i-e-mail kini sa dokfritz@yahoo.com. Ang dili magpamantala dili matubag!)

Gipatik sa mantalaang Superbalita Davao Mayo 24, 2017.

View Comments