Investigative report: Napasmo nga mamumuo (Ikaduha sa upat ka guwa) | SunStar

Investigative report: Napasmo nga mamumuo (Ikaduha sa upat ka guwa)

Time to read
1 minute
Read so far

Investigative report: Napasmo nga mamumuo (Ikaduha sa upat ka guwa)

Tuesday, May 23, 2017

SA MIAGING semana, atong nasayran nga giatbangan sab sa kapin 200 ka mga empleyado sa Shinsun Tropical Fruits Corporation ang welga sa 32 ka mga nataktak nga empleyado nga gipaluyohan sa Kilusang Mayo Uno (KMU) - Southern Mindanao Region (SMR).

Hangyo sa mga empleyado nga hunungon na ang ilang strike aron makabalik sila pagtrabaho sa banana plantation sa Compostela Valley Province.

Suma sa mga empleyado nga nagdala og plakard atubangan sa Department of Labor and Employment (Dole)-Davao Region niadtong miaging semana, kinahanglan nga matapos na ang maong strike kay napasmo na ang ilang pamilya.

"Nagpadayon ang welga tungod sa paglikay sa Koreana nga tag-iya sa plantasyon sa among hangyo nga pabalikon ang ilang gitanggal nga trabahante," suma ni Carlo Olalo, secretary-general sa KMU.

Si Olalo nagkanayon nga magpadayon ang strike sa empleyado hangtud di mosugot ang kompanya nga pabalikon sila sa trabaho ug bayaran ang tanan nilang benepisyo.

Alang ni Olalo, nagdumili ang kompanya sa pagpabalik sa trabaho sa mga gitaktak nga empleyado tungod kay di buot ang kompanya nga dunay unyon.

"Siya (tag-iya) ang miingon nga mobayad nalang siya kay di siya gusto og union," sulti ni Olalo.

Dugang niya nga dihang nag-strike na sila, ang 81 ka mga trabahante nga gitaktak sa trabaho gitanyagan sa kompanya nga mahimo silang mobalik sa trabaho apan kinahanglan nga mopirma sila og waiver ug dawaton ang P2,300 nga cash bugti sa di na nila pagsingil sa uban pang benepisyo.

Mga nag-strike nga trabahante, suma sa tagdumala sa kompanya, mao kadtong natanggal nga resulta sa wa pag-renew sa agency nga nagsuplay og trabahante sa plantasyon.

"Actually, nag-expire na ang contract nila last March 15, 2017. Ug kadtong nangatanggal sa trabaho mao to ang failed ang ilang performance evaluation," suma sa usa sa mga opisyal sa kompanya nga naghangyo nga di lang isuwat ang pangalan alang sa iyang seguridad.

Gipasabot niya nga angay magpasalamat ang mga nataktak nga empleyado tungod kay gibayaran gihapon sa kompanya ang separation pay bisan contractual lang sila.

Ang kompanya nagtanyag nga bayaran og balor usa ka bulan nga sweldo ang matag tuig nila nga serbisyo sa plantasyon.

"Kini silang mga tawhana ang mas isog kung makita sa ilang supervisor nga di magtarong og trabaho, ila dayong hagiton og sinumbagay," sulti sa opisyal.

Dihang gipangutana kung duna ba silay permit sa strike, giangkon ni Olalo nga wa na nagkuha niini ang mga nagwelga nga empleyado, apan ila kining nahimo tungod kay ilegal sab ang pagtanggal kanila sa kompanya.

"Gusto sa Dole nga maglingkod ang tag-iya ug ang 32 ka mga nag-strike nga empleyado, pero wala sila (tag-iya) nagkig-koordinar para masulbad ang problema," sulti pa niya.

Sa isyu nga wa gipasulod sa mga nagprotesta ang ubang empleyado sa kompanya, si Olalo mitubag nga di tinuod ang akusasyon.

"Ginapasulod man sila sa plantasyon aron magtrabaho, pero ang gibabagan lang sa nag-strike ang pagpagawas sa ilang produkto
nga saging," sulti ni Olalo.

*****

Sa sunod nga guwa, atong ipatik ang nahitabo sa kompanya tungod sa strike.

Gipatik sa mantalaang Superbalita Davao Mayo 24, 2017.

View Comments