Davao Occidental apil makig-alayon sa DOST | SunStar

Davao Occidental apil makig-alayon sa DOST

Time to read
less than
1 minute
Read so far

Davao Occidental apil makig-alayon sa DOST

Tuesday, May 23, 2017

MALITA, Davao Occidental -- Nalakip ang bag-ong probinsiya sa Davao Occidental nga milagda sa memorandum of agreement (MOA) tali sa Department of Science and Technology (DOST) ug uban pang ahensiya aron hinanaling makaresponde sa takna sa kalamidad.

Gibutyag ni Harry Chester Camoro, action officer sa Provincial Disaster Risk Reduction Council (PDRRMC) sa probinsiya, nga gihimo ang MOA signing tali sa DOST, CDRRMC sa Davao City, probinsiya sa Davao del Norte, ug ubang pang ahensiya.

Usa ka project DOST DEWS (Deployment of Early Warning System) ang imuntar sa mga dapit nga peligro sa kalamidad ug gikinahanglan ang disaster response protocol.

Mapasalamaton sab ang probinsiya nga nalakip sila sa maong proyekto sa DOST ilabi na nga dako kini og ikatabang sa katawhan niini.

Nasayran nga nag-ungaw sa kalamidad ang bag-ong probinsiya sanglit kanunay nga makasinati og linog ang lungsod sa Sarangani, gawas pa nga adunay mga pagbaha ug pagdahili sa yuta sa mga kabukirang bahin sa lima ka mga lungsod niini.

Matud ni Camoro nga kanunay silang nangandam sa takna sa emerhensiya mao nga gina-monitor gyud niini ang mga lungsod sa Sarangani, Jose Abad Santos, Don Marcelino, Sta. Maria, ug Malita sa takna nga magdaut ang panahon.

Gipalibutan sab sa kadagatan ug nag-atubang sa Pacific Ocean ang probinsiya nga mao nga bisan ang mga dagkong balud kanunay nilang gibantayan.

Hinuon, gipa-igmat kanunay sa PDRRMC ang publiko sa takna sa emerhensiya aron andam sa bisan unsang pagsulay sa kinabuhi. (Orlando B. Dinoy)

Gipatik sa mantalaang Superbalita Davao Mayo 24, 2017.

View Comments