Kawani sa Customs sikop sa PDEA | SunStar

Kawani sa Customs sikop sa PDEA

Time to read
less than
1 minute
Read so far

Kawani sa Customs sikop sa PDEA

Monday, May 22, 2017

SIKOP ang usa ka giingong customs police ug na-rescue ang 16-anyos nga babaye kinsa kauban niini atol sa gilusad nga drug bust sa San Pedro Police Station.

Ang drug bust gipahigayon ala 1:10 Lunes sa kaadlawon, Mayo 22, sa Mamay Road, Barangay Angliongto, dakbayan sa Davao.

Ang suspek giila sa kapulisan nga si Jose Salvador Yumang Batu Jr., 43, usa ka special agent 1 sa Bureau of Customs (BOC) ug residente sa 629 Gladiola Street, Barangay Buhangin Proper, ning dakbayan.

Atol sa operasyon, kauban sa suspek ang usa ka koliheyala nga menor de edad ug gilayon kining gi-rescue sa Women and Children's Protection Desk (WCPD) sa presinto dos.

Subay sa blotter nga natala sa kapulisan, ang suspek nakig-transaksyon nga mobaligya og druga sa nagtakuban nga pulis hinungdan nga gilusad dayon ang drug bust.

Nakuha sa posisyon sa dinakpan ang usa ka dakong pakite sa shabu nga dunay street value nga P10 mil ug linikit nga pinaugang dahon sa marijuana.

Gikustodiya sab sa kapulisan ang sakyanan sa suspek nga Honda CRV LGC-682 nga naka-rehistro sa pangalan sa suspek.

Kasong pagsupak sa Republic Act 9165 kun Comprehensive Dangerous Drugs Act of 2002 ang atubangon sa suspek didto sa korte.

Gipatik sa mantalaang Superbalita Davao Mayo 23, 2017.

View Comments