3 hepe gi-relieve tungod sa NPA? | SunStar

3 hepe gi-relieve tungod sa NPA?

Time to read
1 minute
Read so far

3 hepe gi-relieve tungod sa NPA?

Wednesday, May 03, 2017

UPAT ka adlaw human nahitabo ang dungan nga pagpangatake sa New People's Army (NPA) sa Lapanday Foods Corporation, Lorenzo Farms, Macondray Plastics nga nahimutang sa tulo ka political districts sa siyudad, gihimo sab ang pag-relieve sa tulo ka hepe sa kapulisan sa Buhangin, Calinan, ug Marilog.

Ang pagbalasa sa mga opisyal sa kapulisan gidudahan nga dunay kalambigitan sa pagpangatake sa NPA sud sa ilang area of responsibility (AOR), apan gibarugan sa Davao City Police Office nga natural movement lamang kini aron hatagan og higayon ang mga junior officers nga makahimo sa mga sentibo nga buhaton.

Si DCPO director Alexander Tagum maoy nangulo sa turnover ceremony sa DCPO alang sa paghulip sa police station chiefs sa Buhangin, Calinan, ug Marilog subay sa relief order sa Police Regional Office (PRO).

Gipasabot ni Tagum nga ang pagbalhin sa mga hepe sa kapulisan di tungod sa pagpangsunog sa planta sa Lapanday sa Barangay Mandug, Buhangin District ug pag-atake sa Lorenzo Farms sa Barangay Pangyan, Calinan District, ug mga nahitabong pagpangsunog sa mga container vans sa Marilog District nga giingon nga hinimoan sa NPA.

"Regular movement kini sa atong kapulisan aron mahatagan pod nato og kahigayonan atong mga junior officers sa ilang bag-o nga challenge ug responsibility, wala nagpasabot nga dunay nahitabo sa ilang AOR maong gi-relieve sila," sulti ni Tagum sa pakighinabi sa Sun.Star Superbalita kagahapon.

Si Chief Inspector Milgrace Cajes Driz, hepe sa Buhangin Police Station, gihimo nang hepe sa City Police Strategy Management Unit (CPSMU) samtang ihulip kang Driz mao si Chief Inspector Jack Tilcag, deputy
sa Operation Section sa DCPO.

Ibalik sab si Chief Inspector Carlito Apilat nga deputy sa Operation Section, kinsa maoy gi-relib nga hepe sa Calinan Police Station nga
maoy gunitan karon sa bag-ong hepe nga si Chief Inspector Nolan Raquid gikan sa CPSMU.

Si Chief Inspector Roy Mateo, deputy commander sa Toril Police Station, ang bag-ong hepe sa Marilog Police Station hulip sa gi-relib nga si Chief Inspector Roman Alvarez nga karon gibalik sa iyang daan nga opisina sa Traffic Group (TG) isip deputy commander.

Ang City Public Safety Company (CPSC) gunitan sa bag-ong hepe niini nga si Police Supt. Ireneo Caburnay kinsa maong chief sa deputy city director for operation (DCDO) nga pulihan ni Police Supt. Emmanuel Caquilala gikan sa CPSC.

"All officers, come and go lang kami sa position namin to give opportunity to our junior officers," ingon ni Tagum.

Gipatik sa mantalaang Superbalita Davao Mayo 04, 2017.

View Comments