Butang nga makasalipod sa windshield | SunStar

Butang nga makasalipod sa windshield

Time to read
1 minute
Read so far

Butang nga makasalipod sa windshield

Monday, May 22, 2017

ANG problema gud aning ubang tag-iyag sakyanan murag gihimo nila og balay ilang behikulo. Ilang gidala ang sala sa balay diha sulod sa kotse o van o bisan sa truck.

Kon moadto ka sa ubang nasod, makakita gani ka og mga stuff toys ug mga abotbot nga gipangbitay sa atubangan, dili na ikapangutana, ang tag-iya anang sakyanana Filipino gayud.

Makapamatuod ko ana, kay sa mga lugar nga akong nabisitahan sa Palau ug Saipan, ingon ana gihapon ang gipanghimo sa mga Filipino.

Buhaton na nila labi na sa mga nasod nga dili kaayo estrikto kining pagbutang og mga dekorasiyon sa dashboard.

Ambot kinsay nagpasaugda niana, ug karon nitakod na pag-ayo halos sa tanang nanag-iya og sakyanan.

Bisan unsa nalay ipangbitay sa ilang atubangan na halos di na gani makita pa ang dalan kay grabeng nakasalipod na ang mga dekorasiyon.
Labi na kining mga public utility jeepney ug mga bus de pasaheroan, naghinobra usahay ang ilang mga dekorasiyon, dugang pa sa sign board sa ilang rota.

Mas maayong sundon nato ang tiunay nga paggamit sa sakyanan aron malikay ta sa disgrasya. Hawanan nato ang windshield ug dashboard aron tin-aw atong paglantaw sa unahan.

Busa walay katarungan nga di nato suportahan kining balaod nga Anti-Distracted Driving Act.

Pasalamat ta nga gisugdan na kining kampaniya ubos sa administrasiyon ni Presidente Duterte batok sa mga nakasalipod sa windshield.

Kon buot hunahunaon nadelatar na pag-ayo kining pagpatuman sa balaod kay seguro gitabaliwala sa gobiyerno o giabusohan sab sa mga motorista o mga tag-iya og sakyanan.

Labing batakang kondisiyon kini sa mga tag-iya og sakyanan nga walay ibutang nga makasalipod sa windshield.

Apan, bisan pa sa regulasiyon, nagmagahi o wala masayod ang mga tag-iya o drayber og mga sakyanan. Sulod sa dugay'ng panahon wa gayud kini matagad busa, tingali alang kanila insakto ilang gipanghimo.

Karon, makita nato unsa kasinsero ang administrasiyon ni Duterte alang sa pagbag-o ug kausaban.

Ug dili baya bug-at, dili lisod ug labaw nang dili makadaot kon atong sundon kining gipangdili sa Anti-Distracted Driving Act.

Sa maong balaod gidili ang paggamit og cellphone pagtawag, text, pagdula og games o pag-surf sa internet bisan kon naka-stop ang sakyanan atol sa red traffic light.

Kining mga abobot, mga sign board o bisan refreshener nga gipangbitay, daan na kanang gibawal sa memorandum circular sa Land Transportation Office.

Gipatik sa mantalaang Superbalita Cagayan de Oro Mayo 23, 2017.

View Comments