Todino: Paglainlain sa basura, kinahanglan gyud | SunStar

Todino: Paglainlain sa basura, kinahanglan gyud

Time to read
1 minute
Read so far

Todino: Paglainlain sa basura, kinahanglan gyud

Tuesday, May 16, 2017

DUGAY na kining kampaniya sa kagamhanan sa dakbayan pinaagi sa City Environment Office paglain sa mga basura nga pwedeng i-recycle.

Niadtong miaging semana gipasidan-an na usab ni City Local Environment and Natural Resources Office Chief Edwin Dael ang mga opisyal sa barangay sa ilang kampaniya.

Nipasidaan si Dael ang mga molupyo nga magdumili pagtuman sa program dili kuhaon ilang mga basura ug ang mga molupyo na unyay molabay niini mismo ngadto sa dumpsite.

Magkinahanglan gyud ang gobiyerno og dugang pailob alang niining maong programa.

Sa dugay’ng panahon, wala maanad ang mga molupyo paglainlain sa ilang basura nga plastic gikan sa biya nga pagkaon, papel ug uban pang klase sa basura.

Hinuon, sulod sa dugay’ng panahon sobsob sab ang kampaniya sa gobiyerno bahin sa waste segregation.

Apan, nganong hangtod karon, pipila lang gayud ang mituman sa maong programa.

Tinuod katungdanan sa gobiyerno ang paghatag og makatagbaw nga serbisyo labi na sa paghipos sa atong mga basura.

Apan, kinahanglan sab nga responsabli ang mga molupyo unsaon pagpahiluna sa ilang mga basura.

Panahon na tingali nga butangan nga gayud og “ngipon” sa gobiyerno ang ilang pagpatuman sa waste segregation program.

Sa ubang nasod, mag-atubang og dakong multa ang si kinsa mang dili motuman sa insaktong paglabay sa basura.

Ang ubang dapit, gipadumala nila sa pribadong kompaniya ang pagkuha sa mga basura – nagpasabot nga dunay bayad.

Kon magmagahi gayud ang katawhan pagsunod sa program sa waste segregation, mas maayo tingali ipamugos na gayud sa gobyerno ang ilang gusto.

Dili maayo nga patumanan lang nato ang gusto kanunay sa katawhan bisan makadaot na sa kinaiyahan ang ilang gipangbuhat.

Apan, sa dili pa nato estriktohon pagpatuman gyud ang programa, kinahanglan ipakita sa atong pamunoan unsa ka seryoso sila sa kampaniya pinaagi sa paghimo og ehemplo sa tanang buhaton sa gobiyerno nga i-compliance sa programa.

Gipatik sa mantalaang Superbalita Cagayan de Oro Mayo 17, 2017.

View Comments