Barangay kapitan gisanggot | SunStar

Barangay kapitan gisanggot

Time to read
1 minute
Read so far

Barangay kapitan gisanggot

Tuesday, May 23, 2017

MANTICAO, Misamis Oriental -- Milanding sa tambalanan ang usa ka barangay chairman sa Camanga sakop ning dakbayan human gisanggot sa iyang silingan mga alas 7 sa gabii, Mayo 20, sa nasangpit nga barangay.

Giila sa kapolisan sa Manticao ang biktima nga si Johnny Casagan Denque, 38, minyo, samtang ang suspek si Ariel "Tata" Caliso, 28.

Sa spot report sa kapolisan, usa ka kagawad sa barangay ang nanawag sa estasyon aron ipahibalo ang maong insidente.

Sa pagsusi sa mga otoridad sa dapit, nadala na ngadto sa Misamis Oriental Provincial Hospital sa Manticao ang biktima apan tungod sa “advice” sa doktor, gibalhin kini ngadto sa Northern Mindanao Medical Center sa Cagayan de Oro City.

Miingon si Manticao Municipal Police Station Marlo Lanioso nga sa ilang inisyal nga imbestigasyon, kuyog nga nag-inum ang duha dihang nangutana ang suspek sa biktima nganong wala siya maapil sa listahan sa mga “drug cleared” nga naka-surrender naman siya.

"Pareho ni silang duha mga drug surrenderees. Mitubag lage daw si Kapitan nga 'tungod kay wala ka na-cleared, aw alam na.' Tungod kay naka-inum na, na-init ang ulo, mikuha og sanggot, gitigbas si Kapitan sa li-og," asoy ni Lanioso.

"Nagsugod naman gud ta'g clearing sa mga far-flung barangays niadtong mga 'drug surrenderees' nato. Nagpahigayon ta'g assessement kay ang resulta ana maoy requirement para ma-certify nga drug cleared ang usa ka barangay," dugang si Lanioso.

Misibat ang suspek human sa panghitabo apan mitahan ra usab kini sa Iligan City Police Station 3 sa Dalipuga, Iligan City.

Sa pagkakaron, nakatakdang operahan ang biktima samtang ang suspek na-turn over na sa Manticao Municipal Police Station.

"Wala pa nato madungog ang side sa biktima kay dili pa kini ma-istorya," dugang ni Lanioso.

Gipatik sa mantalaang Superbalita Cagayan de Oro Mayo 24, 2017.

View Comments